Kontu zaharrak / Joxe Arratibel / Erein, 1995

Tradiziotik hurbil Javier Rojo / El Correo, 1996-03-21

Askotan aipatu izan da euskaraz alde handia dagoela ahozko eta idatzizko tradizioen artean. Hau dela eta, funtsezkoa iruditzen zait Arratibelen Kontu zaharrak liburua. Idazlan honetan ipuin tradizional batzuk biltzen dira, baina ahozko tradizioan oinarrituta badago ere (idazleak entzundako istorioak dira-eta), ipuin “irakurgarriak” eskeini dizkigu. Hau da, ez du etnologia egiteko asmorik, eta testuak sistema estandarrean eskeinita daude. Dena den, istorioek ez dute galdu ahozko kontakizunen indar eta bizitasuna: irakurtzekoak badira ere, ozen irakur daitezke eta ahozko kontakizunen erritmoa mantentzen dutela nabarituko du irakurleak. Ipuin horietako batzuk oso ezagunak dira Euskal Herrian; beste batzuk, ordea, hemengoak ezezik edonongoak ere badirela esan daiteke. Izan ere, norbere tradizioan murgiltzea tradizio unibertsalera hurbiltzeko era bat da, besteak bezain ona, tradizio hauek gehienetan pentsatzen den baino hurbilago baitaude elkarrengandik. Ez dut artikulo hau bukatu nahi edizioari buruz zerbait esan gabe. Edizioa zaindua da, Antton Olariagaren marrazkiekin apaindua, eta idazleari berari egindako elkarrizketa bat hitzaurretzat daukana. Lehen esandakoari eutsiz, oinarrizko liburua da, zentzu askotan.