susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Erretorearen ispiluak | Ez gara oso ezberdinak »

Ibilaldia - Itinerario (1950-1990) / Juan Mari Lekuona / UPV-EHU, 1996

Bidearen mugarriak Javier Rojo / El Correo, 1996-06-20

Bere ibilbide poetiko osoari erreparatzen badiogu, esan dezakegu Juan Mari Lekuona gaur egun euskal poesiak duen ordezkaririk garrantzitsuena eta hoberena dela. Izan ere, orain arte berrogeitaka urtez luzatzen den bide honetan Juan Mari Lekuona beti saiatu izan da bere obra desberdinetan poesiari zerbait gehiago erasten, poesiak euskal kulturari zerbait gehiago eskain diezaion. Bide honetan bere liburuek mugarri desberdinak osatzen dituzte, poesia molde desberdinak erakutsiz: poesia erromantikoa, existentzialismo humanista, surrealismoa… Eta orain arteko ibilbide honen azken pausutzat, Mimodramak eta ikonoak liburua, non poesia oso kontzeptualaren eta landuaren bidez euskal izaera eta arimaren bila abiatzen baita, poesia ezagutzeko era bat ere badela frogatuz. Mugarri desberdinak, beraz, baina helburu bakar bat: beti aurrera urrats bat gehiago emateko asmoa. Bere poesiaren ikuspegi osoa eskaintzeko, liburu hau dugu. Ez daude Lekuonaren poesia guztiak (falta dira, esate baterako, Liburuen karroxa-koak), baina bai gailurrak. Poesiaz gain, erderazko itzulpenak eta hainbat idazle eta kritikoren iritziak ere irakur ditzakegu. Eta opari berezi bat: Lekuonaren beraren hitzaurrea, “Neure poetikari buruz” izenburuaz.