« Plaza berri, eder, bitorea | Nemesio Etxaniz gogoan »

Gerbault bakartia / Xabier Lizardi / Erein, 1996

Lizardi gogoan Javier Rojo / El Correo, 1996-09-26

Aurten ospatu da Lizardiren jaiotzaren mendeurrena, eta egokiera aprobetxatuz edo, liburuxka hau argitaratu da. Lizardi bezalako idazle bat beti harrigarria iruditu zait: Planteamendu estetikoetan (batez ere poesiari dagozkionetan) aurrerazalea izanik, beste alderdietan guztiz kontrakoa da. Eta hori nabarmen ikusten da Gerbault zeritzan itsasgizon bakartiari eskaintzen dion artikuloan. Gizon honek belauntzi batean eta bakarrik munduari buelta osoa eman zion eta gero esperientzia hori kontatu zuen liburu batean, zibilizazioaren kontrako jarrera azalduz. Testu hau Lizardiren poesian agertzen diren zenbait aipamen argitzeko baliagarria izateaz gain, Lizardiren antzeko jarrera azaltzeko ere balio du. Mendebaldeko zibilizazioa, nonbait, ez du gustokoa, jatorragoaren zalea izaki. Azken batean basati onaren mitoaren bertsio bat besterik ez da hau. Liburua osatuz, beste bi artikulo agertzen dira, biak abertzaletasunaren inguruan, eta zenbait puntutan, interes handikoak gaur ere: Funtsezko tesia abertzaletasuna kulturan oinarritu behar dela da eta ez politikan. Politika bigarren mailakoa da. Eta kulturan oinarritutako abertzaletasun honek bakearen bidea du berezko, behin baino gehiagotan Gandhi-z egiten dituen aipamenak lekuko.