« Iraultza anarkistaz diharduen istorioa | Urpekariarena »

Luma eta lurra / Jon Kortazar / BBK-Labayru Ikastegia, 1997

Euskal poesiaz Javier Rojo / El Correo, 1997-05-15

Jon Kortazarrek 80ko hamarkadako euskal poesia aztertu du liburu mardul honetan. Lan hau hartuta, irakurlea berehala konturatuko da eskuen artean duena ez dela hala moduzko saio arin bat. Bestelako lana eskaini digu Jon Kortazarrek honetan. Ikerketa luzearen ondoren, bibliografia lekuko, lan zabala eta sakona burutu du idazleak. Lan zabala, praktikan hamarkada horretako euskal poesia osoa aztertu baitu; lan sakona, testuetan oinarritutako iritzi kritikoz horniturik baitago. Izan ere, datuak ezezik, euskal literatura ulertzeko oso baliagarriak diren interpretazioak ere eskaintzen dizkigu lan honek. Labur adierazteko, lan monumental baten aurrean gaudela esango nuke, hemendik aurrera liburu hau oinarrizko erreferentzia puntua izango baita euskal poesia aztertu nahi duenarentzat. Bost ataletan dago banatuta: Pott Bandaren poesia; esperientzia poesia; Iparraldeko poesia; Susa taldea; eta aurreko ataletan sartzen ez diren hamahiru poeten lanak. Besteak ahaztu gabe, bigarrena biziki interesgarria iruditu zait, euskal poesiaren sistema inguruko poesiarekiko harremanetan jartzen baitu, urte horietan Espainian nagusi izan den tendentziarekin parekatuz. Azken finean, hemen egiten dena besteen maila beretsuan dago.