susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« War Euskal Herriko Antzerki Poower! | Sasoi guztietarako liburua »

Euskal kultura gaur / Joan Mari Torrealdai / Jakin, 1997

Euskal liburugintzaz Javier Rojo / El Correo, 1997-06-12

Euskal kultura gaur izeneko liburu honen azpitituloa ondo irakurri behar da bertan kontatzen dena bere neurri zehatzean hartzeko: “Liburuaren mundua”. Izan ere, Joan Mari Torrealdaik lan mardul eta ikusgarri honetan egin duena azken urte hauetako liburugintzari buruzko ikerketa kuantitatiboa izan da, urtero Jakin aldizkarian egin ohi duenaren antzekoa. Honi idazleei zuzendutako inkesta batean oinarritutako datu estatistikoak gaineratu dizkio, argitaletxe eta merkatuari buruzko datuak ere bildu dituelarik. Beraz, datu ugari eskaitzen digu liburu honek, gaurkotzat hartu ohi den aurkezpen batean: gai zehatzei buruzko lauki argigarriak, idazleei egindako argazkiak etabar. Liburua, ordea, lehenengo begiradan kontrakoa badirudi ere, mugatua da, nire ustez. Alderdi kuantitatiboa aztertzen oso zehatza bada, ezin gauza bera esan arazoaren alderdi kualitatiboa kontutan hartuz gero, hau praktikan alde batera utzi baita. Eta noizean behin kalitateari buruzko iritziak ematen direnean (adibidez, oso ikusgarria gertatzen da euskal idazle hoberenen zerrenda) idazleei zuzendutako inkestan oinarritzen da. Zenbakien sarean galtzeko arriskua dago, itxura hutsean geratuz, zenbakiek ezin isla dezaketen alde hori, kulturak berezko duena, ahaztekotan.