susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Heldutasunezko antzezlana | Hiri itxia »

Euskal literaturaren historia txikia / Jon Kortazar / Erein, 1997

Literatura txikia Javier Rojo / El Correo, 1997-07-10

Jon Kortazarrek Euskal literaturaren historia txikia izeneko liburu honekin 1990.ean argitaratu zuen Literatura vasca. Siglo XX lanean hasitako bidean jarraitu nahi izan du, honetan aztertzeke gelditu ziren puntuetan sakonduz. Hortaz, liburu berri hau bi gairen inguruan aritzen da: ahozko literatura, alde batetik, eta, bestaldetik, gure artean “literatura klasikoa” izen handiarekin ezagutu ohi dena, hau da, XX. mendekoa ez den idatzizko literatura. Lehenengo atalean, sarrerako kapitulo baten ondoren, ahozko literaturaren generoak aztertzen ditu, nire ustez funtsezkoa den (eta hain era argian oso gutxitan egin den) bereizketa bat eginez, Kortazarrek tradiziozko generoak eta tradiziozkoak ez direnak (herri teatroa eta bertsolaritza) bereizten baititu. Bigarren atalak idatzizko literaturaz dihardu. Salbuespenak salbuespen, literatura mota hau aztertu dutenek irizpide filologikoak erabili izan dituztenez gero, ez dute literatura bere hartan hartu. Kortazarren ikuspegia, ordea, desberdina da, literarioa alegia; bere lanean, garai bakoitzeko idazle garrantzitsuenak hartu eta ikuspegi honetatik aztertu baititu. Ondorioz, eta liburuaren izena piskabat aldatuz, euskal literatura benetan txikia izan dela ikusiko du irakurleak.