susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bizitza zaila | Liburu ederra »

Oraingo gazte eroak / Joxe Azurmendi / Luma, 1998

Zaharra eta berria Javier Rojo / El Correo, 1998-09-30

Joxe Azurmendik Nemesio Etxaniz abiapuntutzat hartu du zaharraren eta berriaren arteko borrokaren azalpen berri hau egiteko. ETA sortu zen garaian, Nemesio Etxaniz, gizon tradizionala, baina bestaldetik irekia ere, ezinegonean aurkitu zen “gazteek” irudikatzen zuten egoera berriaren aurrean. Baina historia errepikatu egiten da, omen, eta badirudi gaur ere egoera berdintsuan gaudela, gazteok zer nahi duten ere ulertzen ez dugularik. Diktaduratik demokraziara iragan gara, baina funtsean eskemak ez dira aldatu eta kultur ereduek bere hartan jarraitzen dute. Gai honetaz aritzean merituak aitortu behar zaizkio Joxe Azurmendiri: filosofiaren eta kulturaren jakituria zabala (liburuan gai hauek dira nagusi); edota honelako arazo korapilatsuak erabiltzean ulergarria izateko abilezia. Zeren euskararen erabiltzaile trebea baita, batzutan, hitzak esku artean dituelarik, piskat prestidigitadorearen jokua egiten badigu ere: hitzekin liluratu, hitzen atzean izkutatzen dena azaldu gabe. Honetan dago, nire ustez, liburu honen giltzarria, askotan irakurleak lerro artean miatu behar baitu filosofiaren amaraunean ez itotzeko. Zeren gogoratu behar da zaharraren eta berriaren arteko dialektikan, beti, ahal dena dela sintesia.