susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Xakearen erakargarritasun betierekoa | Aita etsai »

Gay nauzu / Iñigo Lamarca / Alberdania, 1999

Bere buruaz Javier Rojo / El Correo, 1999-06-02

Autobiografiaren esparruan koka genezake Gay nauzu, Iñigo Lamarcak idatzi duen liburua. Honelakoetan maiz gertatzen den bezala, denetatik agertzen da liburuan. Zenbaitetan kondagintzatik hurbil dagoela dirudi; bestetan, gai desberdinei buruzko hausnarketa da liburua biltzen duen haria. Memoria liburutik ere badu zerbait… Edonola ere Lamarcak bere bizitza du kontagai, denboraren aldetik muga argi batzuk jarri dituelarik. Hamar urte zituenetik, hogeita hamar urte bete arte, hau da, homosexualitatea bere baitan sentitzen hasi zenetik, bikote-harreman iraunkor bat hastea lortu zuen arte, Lamarcak bere bizitza jartzen digu begi bistan. Idazleak jakinaraziko digu zein izan den bere ibilbidea bere homosexualitatea era duin eta ireki batean bizitzeko, oreka emozionala eta pertsonala lortu arte. Honelako liburuek (biografiekin etabar esan nahi dut) susmo bitxia, baita kontraesankorra ere, uzten didate. Alde batetik, atal oso garrantzitsuak izkutatzen zaizkigula. Bestaldetik, publiko-pribatu dikotomia zeharo hautsita gelditu dela, berez pribatua dena jendaurrean azaltzean. Nolabait esateko, formaz duinagoa bada ere, idatzizko talk show baten aurrean nagoela iruditzen zait honelakoak irakurtzean.