susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Egiaren gezia | Gerra eta gerraondoa »

Geronimo / Imanol Murua Uria / Elkarlanean, 1999

Geronimoren aukera Javier Rojo / El Correo, 1999-07-21

Imanol Muruak Geronimo gerlari apatxearen bizitza kontatzen digu Elkarlanean argitaletxeak plazaratzen duen biografia bilduma barruan. Biografiaren zatirik handiena gerlari garaiaz aritzen delarik, ekintzen kontakizun bizia ematen digu idazleak: Mexikarren eta musu zurbilen kontrako borrokak, heriotzak, jazarpenak, zin egindako hitzarmenak eta hitzarmen apurtuak… Hau da, filmetan maiz ikusitako istorioak gogora etortzen zaizkigu liburu hau irakurri ahala. Orain, ordea, beste gauza bat interesatzen zait. Bizitzaren azken partean musu zurbilen aurkako borrokan irabazterik ez zegoela konturatu zenean, Geronimori planteatu zitzaion aukera: Heroi moduan hil ala atxilotuta bizi. Heroitasunak alde batera utzita bizitzen saiatzea aukeratu zuen. Izan ere, urte askoan gerlari beldurgarria izan ondoren, feriako apaingarri bitxia izatera heldu zen zahartzaroan. Agian, historiarik gabeko herri batean jaiotakoak ulertu zuen azkenean historiak ez dituela erroreak barkatzen. Eta ezin dugu ahaztu gizaki bakar baten bizitzaren iraupenean (1820.eko hamarkadan jaio eta 1909.ean hil zen) mendebaldeko zibilizazioan milaka urtetan izandako aldaketak ezagutu zituela. Aldaketa gehiegi kontraesanik gabe jasateko.