susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Nigan bizi dadin | HIESaren aurrean »

Desira izoztuak / Ana Urkiza / Elkarlanean, 2000

Desiren gainean Javier Rojo / El Correo, 2000-06-14

Liburuaren azalean esaten denez, Desira izoztuak Ana Urkizak idatzitako lehenengo liburua da. Narrazio liburu honetan kontatzen diren istorioak desiren inguruan aritzen dira. Honetaz ez dago inolako dudarik, bai izenburuan bai ipuinetan zehar hainbestetan agertzen den “desira” hitzak ez baitio bestelako interpretazioari lekurik uzten. Desiren kontu hau aho biko ezpata moduan aurkezten zaigu, bi aldeetatik zauritzen baitu. Desiraren izaeran frustrazioa dago, pertsonaiek ez daukatena baino ez baitute desiratzen, eta, jakina, inoiz desira betetzera helduz gero, betetze hutsak kentzen dio xarma osoa desiratutako objektuari. Ardatz honen inguruan eraiki dira liburuko ipuinak. Liburua, beraz, koherentea da oso. Azaleko itxuran, ordea, istorioek desberdinak izan nahi dute: batzuk, erromantikoak; bestetzuk, ironikoak; baten batek Yourcenar-en narrazio batzuen tonua gogora ekartzen du. Baina azpian daukaten euskarria bat bakarra izanik, azkenean istorio gehienak, nahitaez, oso antzekoak dira. Testua, bestaldetik, oso ondo dago idatzita, eta Urkizak idatzi duen lehenengo liburua izan arren, argi dago ez dela idazte-kontuetan idazle honek egiten duen lehenengo lana. Izan ere, honetan profesional trebea dela erakutsi du idazleak.