susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Zenbakien magia | Mallorcaren lilura »

Gezurrak, gezurrak, gezurrak / Iban Zaldua / Erein, 2000

Eguneroko istorioak Javier Rojo / El Correo, 2000-08-16

Liburu hau irakurri nahi duen irakurleak kontuan hartu behar du hogeita sei ipuineko bilduma baten aurrean dagoela; hots, istorio asko kontatzen zaizkiola liburu horretan eta, beraz, gustokoren bat aurkitzea erreza zaion bezala, bestelako istorioekin ere topo egin dezakeela. Hau da, Iban Zalduaren Gezurrak, gezurrak, gezurrak liburu irregularra dela. Istorio batzuk topikokeriatik oso hurbil dauden txantxak baino ez dira, irakurtzeaz batera oso nabarmen gertatzen den amarru batez eginak. Ipuin hauetan idazleak Euskal Herri topiko bat aukeratu du paradoxan oinarritzen diren istorio batzuk sortzeko. Dena dela, zer da gaur egun Euskal Herri topikoa? Jakina, urrun daude ohiturazko literaturaren oinarriak ziren baserri eta marinelen herri idilikoak. Gaur egungo Euskal Herri topikoa atentatuena eta kale borrokarena da. Diferentzia honek, ordea, ez digu izkutatu behar bata bezain marko topiko-kostunbrista dela bestea. Askoz interesgarriagoak iruditu zaizkit oroimenean oinarritutako istorioak, oraingo errealitatearen eta aspaldiko ilusioen arteko aldea, denboraren pausuak sortutako zaurietan azaldua, agertzen baitute. Liburua, beraz, desorekatua da nire gustorako eta irakurlearekiko konplizitatea gehiegi bilatzen du.