susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bihotz bi: Gerrako kronikak | Eguneroko istorioak »

Euskarak sorgindutako numeroak / Patziku Perurena / Erein, 2000

Zenbakien magia Javier Rojo / El Correo, 2000-08-09

Euskarak sorgindutako numeroak izeneko saiakeraren berragitarapena agertu da arestion. Liburu mardul honetan Patziku Perurenak zenbakiek herri literaturan duten aztarnari jarraitu dio, haien atzean gordetzen diren interpretazioak emanez. Izan ere, hizkuntzak eta literaturak zenbakiak zerbait magiko bihurtu dituzte eta Perurenak magia horretan murgiltzeko eta magia hori sentitzeko laguntza eskaini nahi du. Saiakera honetan ikusiko dugu nola zenbaki bakoitzak hasieran pentsa litekeena baino leku handiagoa hartzen duen herri literaturan, halako moduan non ia zenbaki guztiek, errepresentatzen duten balio zehatza ez ezik, bestelako balioak ere erakusten baitituzte. Liburuan bi gauzarekin egingo du topo irakurleak. Alde batetik, zenbakien irizpidea erabilita egindako herri literaturaren antologia dugu. Datu enpirikoak, alegia. Bestaldetik, datuei idazleak ematen dizkien interpretazioak. Eta interpretazioekin gertatu ohi den moduan, batzuetan irudimenaren hegalaldia oso luzea bada ere, kasu honetan ezin dugu hau akats-tzat hartu, liburua irakurtzeak liburuak berak jartzen dituen mugak onartzea eskatzen baitu. Perurenak bere begien ikuspuntua, berezia eta jakinminez betea, ezagutzera gonbidatu gaitu hemen.