susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ravel heriotza antolatzen | Ahantz ez dezagun »

Iturrino Handia / Hasier Etxeberria / Susa, 2007

Iruzurraren artea Javier Rojo / El Correo, 2007-09-05

Hasier Etxeberriak, komunikabideetan egiten duen lanaz gainera, urtero uzten digu literatur lan interesgarriren bat, narrazioaren arloan batik-bat. Halaxe gertatzen da Iturrino Handia izenburua duen nobelarekin. Errealitatearen eta fikzioaren mugak non dauden arakatu nahirik, nobela honetan pertsonaia bat aurkezten digu idazleak (Iturrino Handia, The Great Iturrino, hain zuzen), zirkuan ibilitako mago behinola ospetsua. Pertsonaiaren ezaugarri horrek adierazten digu nahiko ondo eleberriaren planteamendua. Bi datu gaineratu behar dira. Alde batetik, benetako pertsonak pertsonaia bihurturik agertzen dira nobela honetan, Orson Wells, adibidez; eta bestaldetik esanguratsua izan daiteke behin baino gehiagotan aipatzen dela “F for Fake” izeneko filma. Zirkuak, bere aldetik, Tod Browning-ek “Freaks” filma aluzinagarrian erakusten zuena gogorarazten du. Kontakizunean Iturrino Handiak bere bizitzako zenbait pasarte kontatzen dizkio kazetari bati (idazlearen maskara izan daitekeen pertsonaia isilari). Erlaziorik ez duten pasarteak argumentuan lotzen saiatu da idazlea, argumentua flash batzuen bidez osatuta egongo balitz bezala, inorarik gabeko bidaia dirudien zurrunbilo batean.