susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« New Yorkeko bizitza | Ezinezko lurra »

Gabriel Aresti biografia / Angel Zelaieta / Susa, 2000

Aresti, idazlea Javier Rojo / El Correo, 2001-03-14

Gabriel Arestiren urtea idazle honi buruzko liburu, ekitaldi eta abarrez beterik izan dugularik, aipagarria iruditzen zait Angel Zelaietak idatzitako “Gabriel Aresti. Biografia” izeneko idazlan hau. Zelaieta, honetan ez dago dudarik, ondo informatutako biografoa dugu, liburuan agertzen diren aipuak lekuko. Askotan lehen eskuko informazioa ere jasotzen du, bera ere Arestiren ondoan ibilitako idazlea baita. Informazio hau guztia aprobetxatuta egindako biografia hau idazlea ezagutzeko derrigorrezko lanabesa da.

Gauzak honela, agertzen zaizkigu Arestik hainbat gauzaz pentsatzen (edo, behintzat, idazten) zituenak, adiskide eta etsaien hitzak, polemikei buruzko informazio (ezinezkoa zait Aresti polemikaren batean sartuta egon gabe imajinatzea). Informazio zabala; liburuak, ordea, inpresio bitxia utzi dit: pertsona iluntasunean geratu zait, idazlearena pertsona izkutatzeko maskara bailitzan. Izan ere, Zelaietak gutxitan egiten du datuen balorazioa. Badakit jarrera hau biografoaren aukera dela, eta honetan jator jokatu duela, baina, nik neuk behintzat, batzutan biografoaren iritzi gehiago eskertuko nituzke… itzurka bezala doan idazlearen atzeko pertsona horrengana pixka bat behintzat hurbildu ahal izateko.