Euskal Hiria sutan / Xabier Montoia / Elkar, 2006

Narrazioen alfabetoa Javier Rojo / El Correo, 2007-03-14

Xabier Montoiak “Euskal hiria sutan” izeneko narrazio liburuan egitasmo anbiziotsu bati ekin nahi izan diola esan daiteke. Alfabetoaren letrak bezainbeste narrazioren bidez, Euskal Herriaren irudi osoa eskaini nahi izan duela ematen du, narrazioak puzzle baten zatiak balira bezala. Egoera desberdinak, ikuspuntu desberdinak, kontamolde desberdinak agertzen zaizkigu narrazioetan, baina zeharo beregainak diren arren, badago guztietan errepikatzen den puntu bat. Pertsonaiak, zein ere den bakoitzaren egoera edo ikuspuntua, beren bizitzetan zauri mingarri moduan agertzen zaizkien hutsuneen aurrean aurkitzen dira. Batzuetan aurre egingo diete hutsune hauei eta garaipen txikia lortuko dutela ematen du, bestetan, egoerak gainditzen du pertsonaia. Baina lehenengo kasua gertatzen denean ere, garaipen txikia itxurazkoa baino ez da izango, desesperantzaren sentimendua nagusitzen baita narrazio hauetan, ustezko garaipenean ere pertsonaiak galtzaile suertatzen direlako. Idazkera desberdinak erabiltzeko ahalegina ere aipagarria da, eta narrazio guztietan gorengo maila batera heltzen ez bada ere, osotasunean liburua interesgarria iruditu zait oso.