kritiken hemeroteka

8.531 kritika

« | »

Rimmel / Koldo Izagirre / Susa, 2006

Aitatasun bete hitz Iratxe Retolaza / Berria, 2007-01-28

Harritu egin nau Koldo Izagirreren azken poema-liburuak. Rimmel izenburuak sorrarazi zidan harridurarik, hitz llabur bezain adierazgarri horrek Izagirre poetarengan ezohiko zitzaidan ahots poetikoa iragartzen zuelako. Poemaz poema eginiko irakurraldiak abiaburuko harridura hori areagotu eta indartu besterik ez du egin.

Liburua zabaltzen duen “Egunaren erditzea” poemak jorraturiko gai nagusia aurkezten du: aitatasuna. Poema indartsu horretan, gainera, aitatasunaren gaia poemategian zehar zein ikuspuntutik jorratuko den iradokitzen da: alabarekiko harreman, sentimen eta bizipenetan mamitu den aitatasunaren esperientzia da mintzagai. Euskal literaturan ezohikoa den gaiari heldu dio Izagirrek, aita-alaba arteko harremanari, eta oso deigarria da gaia poesiara bihurturik ikustea.

Aipatzeko da batik bat aitatasunaren mugetan, ezinetan, beldurretan edota harrokeriatan sakondu dela aitatasunaren esperientzia hori hitzetara bihurtzean. Zintzotasunez eta hurbiltasunez. Zehatz esanda, alabarekiko harremanak aitaren nortasunean eta mundu-ikuskeran eragin dituenak dira poemagai, bizi-esperientzian aitak alabari dion zorra aitortuz. Zentzu horretan, norabide konkretuetarako joera duen helduak (aitak) alabarekin ikasi du “elkarri nora galdetzeko beharrik gabe” ibiltzen (13. or.). Alabarekin eginiko sentimenduzko bide hori da poema hauetara bihurtu nahi izan dena.

Alabarekiko harreman eta sentimendu horiek helarazteko, mailaka-mailaka eta sasoika antolatu dira poemak liburu honetan: “Hezur ondoko mami” atalean, alabaren jaiotzarekin bizi eta sentiturikoak bihurtzen dira poemagai; “Nola jaso ote zuen harria trikua?” atalean, alaba haur zenean harekin izandako hitzezko lehen hartu-emanak dira papereratu; “Ur gazia zara” atalean, alabak haurtzarotik nerabezarorantz eginiko bidea du poemagai, hau da, alabaren gizarteratzea; “Laster gure alaba zu bezalakoa izanen da” atalean, azkenik, nerabezarora heldu den alabarekiko harreman eta sentimenduak jorratzen dira, burujabe bidea egiten ikasi duen alabarekiko urruntzea.

Mailakatzea ez da soilik gaika eta aldika mamitzen, bada mailakatzerik hizkuntzaren erabilera eta baliabideetan ere. Hasiera batean, poetak batik bat joera narratiboari heltzen dio, eszenak sortzen ditu. Alabaren haurtzaroa poemagai duenean, aldiz, poetak haur hizkeran ohikoak diren baliabideak bere egiten ditu; poemak hitz joko, hitz totel, hoskidetasun, haur-kanta, igarkizun, ipuin eta erritmo biziz osatzen ditu, alabaren hizkerarantz eta mundu-ikuskerarantz hurbiltzeko saioa eginez. Alabaren eskolaratzea gai bihurtzen duenean, eutsi egiten dio haur hizkeraren baliabide horiei, baina pixkana-pixkana erkaketa, hausnarketa eta ironia leunari bidea zabaltzen dio. Hortaz, helduaroranzko bidean ere, alabaren itzalez beterik daude aitaren hitz dardartiak (azalean irudikatu bezala), hitz zintzoak.

Hoskidetasunez eta hitz jokoz osaturiko poema horietariko zenbait errepikakor egin zaizkit, zurrumurru ezagun, nire gusturako. Esate baterako, haur kanta eta igarkizunen moldaketa diren horiek, ez naute besteek bezainbeste hunkitu. Nolanahi ere, ezin uka poemategiaren asmoari kartsuki lotzen ez zaienik, eta alabarekikoak kontatzeko indarrik ez dutenik. Nire ustez, hala ere, lehen ataleko eta azken ataleko poemak dira indartsu eta hunkigarrienak. Poema horietan aitatasunaren zenbait jarrerekiko kritiko agertzen da, Izagirreren poesiak ohiko duen ikuskera kritiko, hausnarkor eta ironiko hori aitatasunaren esperientzian kokatuz, eta ondorioz, aitatasunaren muga eta ezinetan sakontzen ondoen asmatzen duten poemak dira, esperientzia hori helarazteko gaitasun handiena duten poemak dira.

Azken kritikak

Turismo hutsala
Fito Rodriguez

Asel Luzarraga

Zoriona, edo antzeko zerbait
Karmele Mitxelena

Ainhoa Aldazabal Gallastegui

Pleibak
Miren Amuriza

Mikel Asurmendi

Izena eta izana
Jon Gerediaga

Asier Urkiza

Amok
Stefan Zweig

Nagore Fernandez

Auzo madarikatua
Felix Urabayen

Jon Jimenez

Lur jota Parisen eta Londresen
George Orwell

Amaia Alvarez Uria

Olatuak sutzen direnean
Haritz Larrañaga

Joxe Aldasoro

Bisita
Mikel Pagadi

Mikel Asurmendi

Lur jota Parisen eta Londresen
George Orwell

Asier Urkiza

Eresia
Goiatz Labandibar

Nagore Fernandez

Carmilla
Joseph Sheridan Le Fanu

Paloma Rodriguez-Miñambres

Borrero txiki bat
Xabier Mendiguren

Mikel Asurmendi

Puntobobo
Itxaso Martin Zapirain

Jon Jimenez

Artxiboa

2025(e)ko uztaila

2025(e)ko ekaina

2025(e)ko maiatza

2025(e)ko apirila

2025(e)ko martxoa

2025(e)ko otsaila

2025(e)ko urtarrila

2024(e)ko abendua

2024(e)ko azaroa

2024(e)ko urria

2024(e)ko iraila

2024(e)ko abuztua

Hedabideak