susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Sultana damutu zenekoa | Ilegorrien anbiguotasuna »

Bizitza eredugarriak / Txiliku / Elkar, 2006

Biografia eta fikzioa Javier Rojo / El Correo, 2006-11-15

Txiliku ezizenaz ezagutzen dugun idazleak, Jesus Mari Olaizolak, “Bizitza eredugarriak” izenburua duen narrazio liburua argitaratu du. Liburua fikzioaren eta biografiaren artean kokatzen da. Izan ere, aldez aurretik, idazleak irakurlea jakitun jarri du biografía horietan gehiena egiazkoa den arren asmaziotik ere zerbait badagoela. Tira, honelako kasuetan taxuzko irtenbidea testuak fikziozkotzat hartzea izaten da. Hogeita bost biografia argitaratu ditu, ordena alfabetikoan kokatuta, honetan ere amarru txikiren bat ikus badaiteke ere. Idazleak bizitza eredugarri hauetan gehienetan marginalitatean mugitzen diren pertsonaia berezien biografiak kontatzen ditu. Eta iruditu zait bi zutaberen gainean eraiki duela bere literatur eraikina: Borgesen “Historia mundial de la infamia” eta Sarrionandiak egunerokoen itxurapean idatzi dituen narrazioak. Gai trukulentoak gustatzen zaizkio eta noizean behin ironikoa izan nahi du, baina berehala lerratzen da sarkasmorantz. Dudarik gabe, Txiliku idazlari trebea da, baina zentzu estuan bere jarduera ez dagokio literaturari, euskal irakurlego bitxiaren neurriko testugintzari baizik, azken finean irakurleentzako digestoak egiten baititu.