susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Unearen goratzarre intuizioaren narratiban | Alderraiak »

Ero hiria / Javi Cillero / Alberdania, 2006

Hirian lotuak Javier Rojo / El Correo, 2006-06-07

Javi Cillerok “Ero hiria” izenburuko narrazio liburua plazaratu du. AEBko Reno hirian kokatuta daude narrazioak. Kontatzen diren istorio gehienetan antzeko planteamenduak agertzen dira, zeren narrazio gehienak pertsonen arteko harremanez aritzen baitira, batez ere, bikote harremanez. Askotan aspaldian ahituta zeuden harremanei eutsi nahi izaten diete pertsonaiek, aldaketen beldur, edota iraganaren zama handiegia izango balitz bezala. Etorkizunari begira ere pertsonaiok ez dute itxaropen handirik erakusten, eta barne-bakardadean mugitzen dira hara hona. Alde horretatik Reno hiriak ezin leku egokiagoa ematen du horrelako pertsonaien jokaera azaltzeko. Narrazioetan irudikatzen den bezala, hiria irla da, naufragoen salbamendua izan daitekeen irla, baina espetxea ere izan daitekeen irla, handik ezin atera daitekeenean. Zenbait pertsonaia errepikatzen dira narrazio desberdinetan, behintzat hala dirudi behin baino gehiagotan, giza-harremanen sare nahasia osatuz. Narrazioak, bestaldetik, sekuentzia zehatzetan zatituta egoten dira, filmak bezala, eta honek zalutasun handia ematen dio kontakizunari. Eta elipsiek ere garrantzia dute. Izan ere, hizkuntzak ezin du adierazezina azaldu.