Ametsen baratza / Askoren artean / Elea, 2005

Gaztetxea aitzakia Javier Rojo / El Correo, 2006-03-08

Narrazio antologia da “Ametsen baratza” izeneko liburu hau, tarteka pomearen bat (eta irudiren bat) agertzen bada ere. Gaur egun euskaraz idazten duten idazle askoren izenak (berrogei idazletik gorako zerrenda osatzen dute) agertzen dira bertan, eta alde honetatik euskal literaturaren egoeraren eta osasunaren berri emateko baliagarria izan daiteke, idazlan hauen mugak onartuz gero, jakina.

Sorgintxulo gaztetxeari egindako omenaldia baita liburu hau, eta gaia jarrita, idazleek gaztetxeekin zerikusia zuten testuak idatzi behar zituzten. Enkarguzko idazlanak, beraz. Muga hauek kontuan hartuta, euskal literaturaren ildo nagusiak agertzen dira, narratibaren arloan behintzat.

Izan ere, testu askotan errealismo zikinerako joera ikus daiteke, sofistikatuenek errealismo zikin hori Carver-en eraginaren zipriztinekin atontzen badute ere. Gehienek ez dute estiloa lantzeko berebiziko asmorik erakusten, eta testuren bat kazetaritza kronikatik hurbilago dago ipuinetik eta narrazio laburretik baino. Gaztetxeekin lotutako ohiko gai gehienak ere agertzen dira: alkateen jokabidea, poliziarekiko liskarrak… Nahiko folklorikoak, J.L. Zabalak esango lukeen moduan.