« Bihotza kontuak hozkailuan sartzeko garaia | Agur, Euzkadi »

Fidel izan beharraz / Oskar Wilde / Ibaizabal, 2000

Komedia arina Javier Rojo / El Correo, 2001-01-24

Oskar Wilderen (1854-1899) “The importance of Bein Earnest” antzezlanaren euskal bertsioa da “Fidel izan beharraz” izenarekin agertu zaigun testu hau. Ikus daitekenez, itzulpena baino gehiago egokitzapena da bertsio hau, jatorrizko testuaren izenburua egiten den hitz jokua euskaraz ere nolabait gorde nahian sortua. Itzultzailearen (Antton Olano Irurita) aukera hau arriskutsua da, irakurle askok “traduttore, traditore” hura hizpidera ekar baitezakete; baina honetan esan behar da itzultzaileak asmatu egin duela eta nire ustez itzulpen batez egin daitekeen goraipamenik handiena merezi duela: irakurlea ez da konturatzen itzulpen baten aurrean dagoela.

Komedia arina, dibertigarria da lau ekitalditan ematen zaigun antzezlan hau, ironiaz eta sarkasmoz betea. Itxurakeriaren inguruan aritzen da lan hau. Izan ere, pertsonaiek bakarrik azalezko kontuei antzematen dietelarik, norberaren izena izango da pertsonaia batek aurkez dezakeen ezaugarririk garrantzitsuena. Izenaren atzetik izana omen dator, baina kasu honetan ez dute zertan bat izan behar. Istorioa korapilatua da batzuetan eta ez du txarto ulertuen bidez sortutako egoera barregarririk falta. Azken finean, azalkeriaren azalezko kritika dibertigarria baino ez da.