susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Asmatu beharko zuketen | Oro ez da errana »

Mutuaren hitzak / Hasier Etxeberria / Susa, 2005

Hilketa aitzakia Javier Rojo / El Correo, 2005-12-21

Hasier Etxeberriak Damian Arruti protagonista duen beste nobela baten adibidea eskaintzen digu “Mutuaren hitzak” izenburuko liburu honetan. Nobela beltzaren parametroetatik abiatzen da testua, baina irakurlea berehala ohartuko da ez dagoela ohizko nobela beltz baten aurrean. Nobela beltzetan bezala, hemen ere heriotza bat agertzen zaigu hasieran, hilketaren itxura duen heriotza. Baina idazleak beste bide batzuk hautatu ditu, zeren nobelaren erdira arte ez baita berriro hilketaren kontu hori aipatuko. Bitartean ikertzailearen arazoez hitz egingo zaigu, pasa berria duen gaixotasunaz, Baztan aldera egiten duen bidaiaren arrazoiez, arteaz eta literaturaz, digresio handi bat izango balitz bezala, idazleak hilketa ahaztu balu bezala. Izan ere, hilketarena aitzakia baizik ez baita nobela honetan, pertsonaia baten krisia kontatzeko erabiltzen den amarru txikia. Idazleak saio bereziak egiten ditu argumentua maila desberdinetan gauzatzeko, bitxi xamarra dirudien narratzaile baten eta protagonistaren beraren hitzak tartekatuz. Bestaldetik, errealitatearen logika bermatzen duten euskarriak zein ahulak diren ere nabarmentzen da nobela interesgarri honetan. Hilketa? Jakina, amaieran dena argitzen da, baina hori gutxienekoa da.