susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Dana emon biar yako | Zergatik ez nauk maite? »

Bakezale gerlari horiek / Bixente Serrano Izko / Pamiela, 2004

Indarkeria dela-eta Javier Rojo / El Correo, 2005-04-27

Bixente Serrano Izko saiakeraren alorrean egiten ari den lanaren emaitza berria da “Bakezale gerlari horiek” izeneko liburu hau. Bertan saiatzen da azaltzen zein zentzugabea den gure gizartean indarkeria politikoa. Eta ahalegin hau indarkeriaren alde daudenei zuzentzen die, hauek konbentzitzea baitu helburu. Jarrera bakezale desberdinak aztertzen ditu horretarako, eta bakearen aldeko jarrera lirikoa eta epikoa aipatzea merezi ez duelako ondoriora heldu ondoren (izan ere, ikuspuntu hauetatik ezinezkoa baita konbentzitzea gaur egun eta hemen indarkeriaren alde dagoen bat), etika makiavelikoan aurkitzen du irtenbidea. Izan ere, indarkeriaren bidez lortu dena, indarkeriaren alde zeudenek teorian lortu nahi zutenaren kontrakoa denez gero, hauek konturatu beharko lirateke inoiz baino urrunago daudela beren helburuetatik; beraz, garaia da bide hori alde batera uzteko, porrotean amaitu nahi ezean. Ohiko planteamendu etikoak baztertuta, jarrera hau zinikoa irudi lekioke baten bati, baina ziur aski gaur egun eta hemen halako argumentuak besterik ezin dira erabili. Oztopo bakarra du liburuak: abstraktua da, eta argumentazioa batzuetan zailegia dateke irakurle saiatua ez den batentzat; eta honek, jakina, uxa litzake balizko irakurleak.