susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Munduaren behe-lainoa | Bilboko hondakinak »

Hautsi da katea / Toti Martínez de Lezea / Erein, 2004

Frantziako Iraultzan Javier Rojo / El Correo, 2005-03-16

Toti Martínez de Lezea idazlea arrakastatsua da. Irakurlego berezi batekin bat egiten jakin du eta irakurle horien erantzuna zein izan den ikusita argi dago oso ondo egiten jakin duela. Euskal bertsioan agertzen zaigu orain bere nobela bat, “Hautsi da katea” izenburuarekin, eta ez dut dudarik gazteleraz haren liburuak gustura irakurri dituztenak honekin ere dibertituko direla, hau ere nobela historikoaren alorrean kokatzen baita. Frantziako Iraultzaren garaira eramaten du irakurlea, eta kontatzen du zer nolako eragina izan zuten Frantziako Iraultzaren urte nahasiek Euskal Herriko mugaren bi aldeetan kokatutako herrixketan, batez ere Saran. Nobela historiko tradizionalean agertzen diren ohiko osagaiak ditugu hemen. Esate baterako, garai historiko nahasi batean pertsonaia arrunt batzuen bizitza pribatua kontatzen zaigu. Traman, bestaldetik, abentura arriskutsuak, ezinezko amodioak, traizioak, jatorri iluna duten pertsonaiak agertzen dira. Izan ere, nobela honetan nobela historiko tradizionalenaren topikoak erabiltzen dira, guztiak, folletoietan bezala. Abentura erromantikoak kontatzen dituen nobela dibertigarria da, baina hori baino gehiago bilatu nahi duen irakurleak zerbait falta duela pentsatuko du.