susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Barne galderak kanpora begira | Oso gureak, gainera »

Arimaren ondoko ezkien artetik ibilki / Andolin Eguzkitza / Susa, 2004

Sentimenduak gainezka Javier Rojo / El Correo, 2004-12-15

Andolin Eguzkitza ezustean eraman zuen heriotzak eta amaitu gabe utzi zuen poema liburu bat. Orain idazleari omenaldia eginez, hil ondoko argitarapen honetan agertzen zaizkigu poema horiek, “Arimaren ondoko ezkien artetik ibilki” izenburuarekin. Ez dakigu, beraz, zein forma hartuko zuen liburuak idazleak bere lana burutu ahal izan balu. Eguzkitza poesiaren alorrean ez da oso idazle oparoa izan, bere literatur ibilbideak hogeitaka urte iraun badu ere. Edonola ere, erdibidean utzi duen liburu honek aurreko idazlanetan agertzen ziren ezaugarri batzuk agertu arren, bide desberdinak urratzekotan zegoela adieraz dezake. Soildu egin da bere poesia, hizkuntzatik egindako hausnarketa izatetik sentimenduetan eta bizipenetan oinarritutako poesia izatera pasatu da, narratiboa batzuetan, sentimendu hutsen adierazpena bestetan. Bestaldetik, poesiaren subjektua nitasunetik urruntzeko ahalegin batean ikus dezakegu. Begi bistan dago, ordea, hirugarren pertsonaren atzean agertzen zaigun subjektu poetiko hura arazo handirik gabe idazlearekin identifika daitekeela. Ez da, hortaz, fikziozko subjektua, nitasuna izendatzeko beste forma bat baizik. Sentimenduak gainezka zituen idazle baten liburua da hau, aitormen mindua ia.