susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bizitzea abiatzea dela onetsi ondoren, hiltzea irabazi du ezinbestean | Pertsegituak »

Biolinaren jatorria / Jon Aiastui / Elkar, 2004

Bizitza eta bidaia Javier Rojo / El Correo, 2004-11-03

“Biolinaren jatorria”, Jon Aiastuiren eskutik datorkigun liburu hau, poesia argitaratzen den sail batean agertu da. Baina, egia esan, idazlan honetan poesiak liburuaren erdia besterik ez du hartzen. Beste erdian hiru narrazio agertzen dira. Hau, jakina, ez da zertan akatsa izanik, baina poesia bilatzen duen irakurlea bigarren erdian agertzen diren testuen aurrean pixka bat despistatuta gera daiteke, prosa poetikoaren adibideak direla uste badu. Lehenengo erdian agertzen den poesiari dagokionez, oihartzun klasiko batzuk aditzen dira berehala. Nabarmenena, Kavafis-en “Itaka” izeneko poemarena. Aiastuik bere poema batzuk idazterakoan Kavafisen poema famatua izan du oinarrian. Izan ere, bizitza momentu desberdinez osatutako bidaia moduan aurkezten da, eta momentu horiek dute benetako garrantzia, ez helmuga. Hau kontatzeko, paralelismoak eta paradoxak baliatu ditu idazleak. Bigarren erdian agertzen diren bi narraziotan, luzeenetan, destinoaren garrantziaz eta irudimenari esker ihes egiteko aukeraz hitz egiten zaigu. Hirugarrenak, liburuari izenburua ematen dionak, herri tradiziotik hartutako istorioa kontatzen digu. Poesiazaleak eta narraziozaleak gustura aurkituko dira liburu honen aurrean, jakina, zein bere atalean.