« Hizkuntzaren plastikaz | Erotismoak zentsura piztu zuenekoa »

Patata soro bat / Josetxo Azkona / Alberdania, 2004

Istorio laburrak Javier Rojo / El Correo, 2004-07-07

Josetxo Azkona ipuin hiperlaburren lurraldean ausartu da “Patata soro bat” izenburua duen liburu honetan. Eta ausartu dela esan dut, halado ipuinek berezko arriskua baitute haien gainean literatura eraiki nahi denean. Ipuin hiperlaburrak askotan txiste xelebretik edo burutazio intranszendentetik hurbilegi egon daitezke, kontuz ibili ezean, edota, beste muturrera igarota, sakontasun gehiengi erantsi nahi izaten zaie, ipuinak barik, prosaz idatzitako poemak bailiran. Eta, egia esan, Josetxo Azkonak ipuina desegiten duten bi mutur horietatik aldentzea lortu du. Ipuin gehienak bizpahiru orrialdekoak dira (guztira 60 dira, 176 orrialdeko liburu honetan), eta halado aukera zabalean denetarik aurkitu ahal du irakurleak: istorio umoretsuak (baina funts gabeko txisteak ez direnak); ipuin hunkigarriak eta samurrak; narrazio ironikoak eta batzuetan parodikoak; alegoriatik hurbin dauden istorioak. Eta gehienetan oreka gordetzen jakin du idazleak. Istorio hauek osatzen duten kaleidoskopioan munduak, errealitateak alderdi asko dauzkala eta alderdi horieri ikuspuntu desberdinetatik begira dakiekeela erakusten zaigu. Izan ere, gertakari guztiek beren ifrentzua erakusten baitute. Begiak erne bilatu besterik ez da egin behar.