Spam poemak / Castillo Suarez / Elkar, 2004

Mezu galduak Javier Rojo / El Correo, 2004-06-09

Azken urte hauetan Castillo Suarezen izena poliki-poliki ezaguna egin da euskal poesiaren arloan, eta lortzen ari den emaitzak ikusita, ez dago zalantzarik azken belaunaldiko poeta interesgarrienetako bat dela. “Spam poemak” bere azken emaitza poetikoa da. Izenburuak iradokitzen duenari kasu eginez, poema hauek noraezean zabaldutako mezuen parean daude, nork irakurriko zain. Amodioaz hitz egiten dute askotan, baina momentu guztietan gai honetaz aritzean ia oharkabean ager dakizkigukeen topiko erromantikoak alde batera uzten saiatu da. Amodioa agertzen zaigu, baina hau ez da ezeren sublimazioa, naturaleza ez dugu hor poemaren ondoan gaiari marko egoki eta polita jarri nahirik. Amodioa pertsonen arteko harreman bat besterik ez da. Harreman hau, dena dela, absentziaren bidez ere nabarmen daiteke, presentziaren bidez bezainbeste edo gehiago. Halaxe gertatzen da askotan hemengo poemetan, absentziak markatutako amodioaren berri ematen baitzaigu. Lirismoari itzuri egiten dio idazleak poema hauetan. Eguneroko hitzetan bilatzen du lehengaia eta batzuetan prosatik hurbil dagoen poesia erraza dela dirudi. Baina azaleko erraztasun honen azpian, sakontasunik ez dute falta poema hauek.