kritiken hemeroteka

7.304 kritika

Azken kritikak

« | »

Gerrako pilotu / Antoine Saint Exupery (Josu Zabaleta) / Alberdania / Elkar, 2003

Gerraren absurdoa Gotzon Hermosilla / Berria, 2004-05-01

Ipar Euskal Herriko irakurleek, seguru asko, beste pertzepzio bat izango dute, baina Hegoaldeko literaturzaleentzat (eta frantsesaren hizkuntz eremutik kanpoko gainerakoentzat ere bai, apika) Antoine Saint-Exupery Printze txikia lan ezagunari lotua dago ezinbestez. Saint-Exupery ez da lan bakarreko idazlea, baina, beste hainbat kasutan jazo legez, lan bakar batek gaina hartu die gainerakoei eta hark egin du egilea ezagun mundu osoan barrena. Printze txikia, haur literaturaren klasiko ukaezina, munduko hizkuntza askotara itzulitako liburua, umetan gehienok irakurri duguna: batzuen ustez, sentsibilitatez beteriko istorio hunkigarria (“negarra eragin didan lehenengo eta azken liburua”, lagun batek ziostan moduan; duela gutxi, Fun People hardcore taldeko abeslariari elkarrizketa egin nion eta konturatu nintzen, harriturik, Saint-Exuperyren pertsonaia besoetan tatuaturik zeramala); beste batzuen aburuz, ordea, goxoaren goxoz bihotzerrea sortzen duen ipuin mengel moralkeriaz betea.

Saint-Exuperyren gainerako lanetatik orain arte ez dugu izan bakar bat ere euskaraz irakurtzeko aukerarik, baina duela gutxi Alberdaniak eta Elkarrek Gerrako pilotu plazaratu dute, Josu Zabaletak itzulia, Literatura Unibertsala sailean. 1942an idatzia, Printze txikia baino urtebete lehenago, hemen ere, Saint-Exuperyren beste hainbat lanetan bezala, egileak hegazkin pilotu gisa izandako eskarmentua hartzen du oinarri eleberria idazteko.

Istorioa xumea da oso: Saint-Exupery gerrako pilotu eta Errekonozimenduko 2/33 Hegazkin Taldeko kide da Bigarren Mundu Gerran. Naziak azkar asko ari dira Frantzia inbaditzen, armada frantziarra ez da erasoa gerarazteko gauza eta etsipena nagusitzen hasia da. Ingurumari horretan, errekonozimendu misio bat agintzen diete Saint-Exupery eta beste bi laguni. Badakite horrelako hegaldietan abiatzen diren hiru hegazkinetatik bakarrak lortzen duela itzultzea; badakite, gainera, misio horretan lortuko duten informazio guztia alferrikakoa izango dela, armadako buruzagiekiko komunikazioa etenda dagoelako eta informazio hori nori helarazi ez dutelako. Eta, hala ere, abiatu egiten dira. Tiroketa jasango dute, baina, azkenean, bueltatzea lortuko dute.

Ikusten denez, anekdota txiki baten gainean eraikita dago eleberria. Mamia, baina, beste nonbait dago: hegaldian oroitzapenak, sentsazioak eta gogoetak tropelka datozkio gogora egileari, eta xehe-xehe kontatzen dizkigu. Hori da, hain zuzen, liburu honen funtsa.

Saint-Exuperyren ustez, eurek egiten dutena ez da gerra, gerraren simulakroa baino. Armada frantziarra gainbehera geldiezin batean amildurik dago, etsipenak jota, eta etsipen hori gizarte osora hedatzen da apurka-apurka. Egoera endekatu eta ustel horretan, gerraren absurdoa bere indar osoz agertzen da: herri osoak hustu egiten dira, herritarrek nora joan ez duten arren, buruzagiek ezertarako balio ez duten aginduak ematen dituzte eta agindu zentzugabe horiek betetzearren soldaduek bizia galtzen dute…

Eleberria erabat ideologikoa da, batez ere azken atala. Egileak moral zahaberritu bat proposatzen du egoerari buru egiteko, eta nazionalismo frantziarra eta mendebaldeko zibilizazioaren balioak sutsuki goresten ditu. Baina, liburua amaitutakoan, irakurleari sentsazio arraroa gelditzen zaio, eta bere kautan pentsatzen du, egileak ziur aski oso bestelako helburuak eduki arren, liburu honetan agertzen dirten hainbat pasarte antimilitarismoaren antologia batean sar zitezkeela, nahiz eta paradoxa iruditu. Batzuetan, literaturaren bideak erabat bihurriak dira.

Azken kritikak

Irautera
Castillo Suarez

Igor Estankona

Jekyll doktorearen eta Hyde jaunaren kasu bitxia
Robert Louis Stevenson

Joannes Jauregi

Enarak itzuli dira
Gari Berasaluze

Aiora Sampedro

Itsas bizimina
Pello Otxoteko

Alex Uriarte

Lerro etena (2004-2018)
Angel Erro

Iratxe Esparza

Kabitu ezina
Aintzane Usandizaga

Ibon Egaña

Analfabetoa
Iñigo Astiz

Javier Rojo

Fake news, ez dira atzo goizekoak
Fito Rodriguez

Mikel Asurmendi

Maitasun keinu bat besterik ez
Hasier Arraiz

Peru Iparragirre

Mila ezker
Garbiñe Ubeda

Aritz Galarraga

Atzerrian
Nerea Balda

Javier Rojo

Kontrako eztarritik
Uxue Alberdi

Maddi Ane Txoperena Iribarren

Analfabetoa
Iñigo Astiz

Joannes Jauregi

Poesia kaiera
Cesare Pavese

Aiora Sampedro

Artxiboa

Ekaina 2019

Maiatza 2019

Apirila 2019

Martxoa 2019

Otsaila 2019

Urtarrila 2019

Abendua 2018

Azaroa 2018

Urria 2018

Iraila 2018

Abuztua 2018

Uztaila 2018

Hedabideak