susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Itzaleko errainua | Mugarrien garraioan »

Hamairu ate / Askoren artean (Joseba Sarrionaindia eta Mitxel Sarasketa) / Elkar, 1985

Hamairu ate Iñaki Camino / Argia, 1986-02-09

Kanpoko idazle sorta baten txiste, ipuin eta pasarteak itzuli eta aukeratu dituzte Joseba Sarrionaindia eta Mitxel Sarasketak. Hitzaurrean ageri den bezala eta irakurriz ikusten denez, humorearen ideia aldatu beharra gertatuko zaigu denak sail berera bildu nahi baditugu, asko ez bait datoz bat guk humoreaz dugun iritziarekin. Badira txiste motzak: urkamendira doazenenak; pentsalari, bandido, apez eta lukurreroenak; utzi ta gero lagunak itzuli nahi ez duen liburuenak…

Luzeagoak badira ere, bi eta hiru orrialdeetako narazioak: kalteren bat datorrelakoan herritik arrazoi gabe ihesi doazen biztanleena; neska maitasunez urkatu eta gero, neskak maite zuenak zintzilik dakusa bera biaduktoan eta iztarrarteaz atsegindurik urkatutakoaz maitemintzen hasten den mutilarena; erregerik ez duten mezulari etsienak: apezpiku, lehoinabar, uholde eta fameli arteko liskarrak biltzen dituztenak eta besteren bat.

Idazleak hauek dira, XIX eta XX. mendekoak denak: Bierce iparramerikarra; Munro britaniarra; Picabia surrealista; Kafka, Jaguiwara japoniarra; Anibal Machado brasildarra; Max Aub ezaguna; Leonora Carrington; Virgilio Piñera; Kostas Axelos greziarra; García Márquez; Pere Calders katalana eta Gonzalo Suarez asturiarra. Itzulpenak, ia denak, jatorrizko hizkuntzatik eginak dira.