susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Egia eta Edertasuna | Udaldi zoriontsua »

Katearen begiak / Iñaki Petxarroman / Txalaparta, 2003

Historiaren ildotik A. de Amezaga / Bilbao, 2003-07

Ez da literatura eta historia nahasten diren lehen aldia. Jakina denez, nobela historikoa genero ezaguna da, eta arrakastatsua gainera, batez ere bizi dugun sasoian. Hor dugu, besteak beste, Toti Martínez de Lezea arabarra eta bere best-seller-ak. Zer eskaintzen digu, ba, genero honek hain arrakastatsua izateko? Eleberri formadun lan bat irakurtzen gauden aldi berean historia errepasatzeko eskaintza. Bi aukera, beraz: entretenimendua, sentsazioak, alde batetik, eta kultura, bestetik. Iñaki Petxarroman (Lasarte, 1973) kazetariaren liburu honek Nafarroari ematen dio protagonismo osoa. Katearen begiak narrazio luze bat da, non zazpi pertsonaien berri izango baitugu. Hauen artean Antso Azkarra erregea, Marokora bidaiatu zuena, hango erregearen laguntzaren bila; Agosti Xaho zuberotarra eta Santa Kruz apaiza ezaguna. Bi emakume ere ageri dira, Rose Iturbide eta Gloria Rekarte, ezezagunak biak irakurle gehienontzat. Aukeraketa, autoreak adierazi duenez, subjetiboa izan da, azpimarratuz garrantzitsuena ez direla pertsonaiak, baizik eta bizitzea egokitu zitzaien garai historikoak. Estiloari dagokionez, “modu irakurterrazean egiten saiatu naiz liburua, hain justu horretarako, askotan hain korapilotsua egiten zaigun historia modu arinagoan eskaintzeko. Horregatik, historiaz beteriko istoriak kontatzen ditu liburuak”. Ezbairik gabe, Petxarromanek historia gerturatu nahi izan du berriro ere bere bigarren lan honetan. Gogoratu orain hiru urte, argitaletxe berean, Nafarroa: iragana eta geroa argitaratu zuela.