Periyaren zalapartak / Alfonso Maria Zabala / Auspoa, 1963

Periyaren zalapartak Luis Mitxelena / Egan, 1963

EGAN berandu xamar agertzen da jendartean azkenaldi honetan; Auspoak, berriz, hasiera hartan hartu zuen ibilera ez du batere mantsotu. Hori dela eta, liburu berrien kritika lanean hasten naizen bakoitzean, meta aurkitzen dut pilatua mahai gainean. Horrexegatik, labur eta berandu hobe denez gero inoiz ez baino, zilegi izan bekit behar nukeen baino lasterrago, abespeluan edo, antzinako bizkaitarrek esango zuketen bezala, neure egitekoak egitea.

Bost teatro-lan labur agertzen dira liburuxka honetan. Periyaren zalapartakez gainera beste lau. Aipatu dudana eta Melitona-ren bi senarrak Alfonso Ma Zabala apaiz jaunarenak dira. Hiztun ederra eta jatorra genuen, komerigile aparta ez bazen ere.

Mendibe-tarren larriyak, berriz, A. Larraitzen izenean agertu zen, baina izen hori ez omen da izengoitia baizik. Azkeneko biak, Utzi biarko eta Gizon bikañak, itzulpenak omen dira: Juan Mir salesianoaren Los apuros de un fotografo eta Los tres valientes-en antolamenak.

Liburuaren hitzaurreak dioena aldatuko dut hona: Geroztik sarritan aurkeztatu izan dira gure errietan, ta makiña bat euskaldun oroituko da bere gaztetan komeri oyetako bat edo beste ikusiaz. Gazteago direnek ere, ordea, badute hor zer ikasi: hain hurbil eta hain urruti dugun garai bateko giroa, ohiturak eta hizkera, teatrorik xumeena ere ixpilu antzekoa baitugu.