susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hodei berdeak | Martutenez (eta abar) »

Azken afaria / Xabier Montoia / Susa, 2013

Errugaberik ez Javier Rojo / El Correo, 2014-02-15

Xabier Montoiaren eskutik etorri zaigun azken eleberriak “Azken afaria” du izenburua. Idazlan honen argumentuaren abiapuntuan unibertsitate garaitik adiskide diren lau lagunek egiten duten bazkaria dugu. Bertan, ia antzerkirako prestatutako testu bat izango balitz bezala, ikusiko dugu nolakoa izan den lau pertsonaia hauen ibilbidea. Laurok unibertsitatean (zehazki, Deustuko Unibertsitatean eta 60ko hamarkadaren amaieran eta 70eko hamarkadaren hasieran) Zuzenbidea ikasi bazuten ere, bizitzak bide desberdinetatik eraman ditu. Bizitzak bide desberdinetatik eraman ditu, baina, desberdintasunak desberdintasun, beraien arteko harremanak mantentzen dira.

Dena dela, oreka hau hautsiko duen gertakari batek harrapatzen ditu lau lagunak. Felix, ekonomia arloko kontuetan aritzen den abokatuaren semea atxilotu dute kale borroka kontu batengatik. Honek aldaraziko ditu pertsonaiak eta haien arteko harremanak. Izan ere, Felixek, boterean dagoen alderdiaren zalea izanik, bere mundua nola deuseztatzen den ikusten du semea kartzelaratzea inplikatzen duen prozesu honen aurrean. Eta puntu honetan esan behar da, nobelak politikaren gaietara lerratzen den momentuetan, eskematikoa, oso eskematikoa izateko joera erakusten duela, halako eran non batzuetan ematen baitu euskal gatazkaren aurrean zein den hartu beharreko jarrera ere erakusteko asmoa duela. Montoia, edonola ere, idazle trebea da, eta zaharkituta gera daitezkeen kontu politiko horietaz haraindi jotzen jakin du, batez ere semea poliki-poliki nola galtzen duten ikusten duten gurasoen tragedia pertsonala kontatzerakoan.

Orduan istorio eskematikoa, topikoa askotan, garaiko kontuei lotuegi zegoen istorio hori, gaindituta agertzen zaigu familia deuseztatzen duen giza tragediaren aurrean, Felix izeneko pertsonaiaren paranoiak-eta azalduz.