susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Alkasoroko Benta | Historia istorioari gailentzen zaionean »

Gure garaiko heroia / Mikhail Lermontov (Jose Morales Belda) / Elkar, 2013

Kaukason zehar Javier Rojo / El Diario Vasco, 2013-04-13

Poliki-poliki beste hizkuntza batzuetako literaturetan agertzen diren klasikoak euskaraz ere irakurtzeko aukera daukagu. Bilatzeko oh.itura falta dugu bakarrik. Hainbat hizkuntzatatik datozkigu klasiko hauek, eta, kasu honetan, jatorrizkoa errusieraz izan duen nobela bat dugu: Mikhail Jurievitx Lermontov-en Gure garaiko heroia da berriro ere euskaraz Jose Morales Beldaren itzulpenean heldu zaiguna. XIX. mendeko idazlea da Lermontov, erromantizismo garaikoa, Puxkinen gogaidea, Dostoievskik eta Tolstoik beren gailur lanak argitara eman baino lehenagokoa, beraz. Idazlearen biografiari erreparatuz gero, datu harrigarri bat topatuko dugu, gaurko ikuspuntutik begiratuta behintzat: idazlea 1814an jaio eta 184lean hil baitzen, hogeita zazpi urte besterik ez zuela. Eta Puxkin bezala, duelu baten ondorioz hil zen idazlea, berriro ere idazlearen jarrera erromantikoa azpimarratzen zaigularik.

Gure garaiko heroia izenburuko nobela honetan, ia-ia beregainak diren bost narraziotan zehar kontatzen zaizkigu Petxorin izeneko pertsonaiaren ibilerak Kaukason zehar. Nobelan, bestalde, oinarri autobiografikoa topatu dezakegu, idazlea bera ibili baitzen eskualde horretan eta hor ikusitakoa islatzen baita testuan. Eta ez ahaztu: hogeita zazpi urte zituela hil zen. Nobela honetan irakurle desberdinek topatu dezakete beren gustuko osagarririk, eta horrexek (eta ez aspaldikoa izateak) bihurtzen du klasiko. Nahi duenak abentura nobela bat ikus dezake orrialde horietan zehar, abentura horiek Kaukasoko bizimoduak gaineratzen dien exotismoarekin horniturik agertzen direlarik. Nahi izanez gero, nobela sentimental bat ikus dezakegu, Petxorin bezalako pertsonaien sedukzio-abenturak ere kontatzen baitira.

Eta hori guztia, idazleak bizitza jolastzat eta jokotzat hartzen duen gizarte dekadente bat erakusten digun bitartean.