susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Geure historiaren zatitxo bat | Korapiloaren matazan galdua »

Scanner / Leire Bilbao / Susa, 2011

Hiru kilo seiehun Juan Ramon Makuso / El Diario Vasco, 2011-12-16

Teknologiaren aurrerakuntzarekin, ohikoa bihurtu da gure bizitzetan hainbat aparatuekin nolabaiteko elkarbizitza bat edukitzea. Dela aireportutan, dela medikuntzan, elektronikan, informatikan, aparailuen bitartez arretaz aztertu daiteke nahi dugun hori. Leire Bilbaok bere bigarren poesi liburua Scanner izenburupean argitaratu du. Badirudi bere asmoa bere bizitza aztertu nahi duela, poesia aitzaki.

Esan behar da, bai liburuaren izenburutik hasita eta liburuak eskaintzen duena, ez dela poesiaren kontzepzioan ohituta gaudenekin. Eta esango nuke, Leire Bilbaok propio bilatu duen artifizioa izan dela. Irakurlea aurkituko da guztiz poesia narratzaile baten aurrean, naiz eta badituen liburuan zehar, hitz joko eta errima ariketak. Eta narrazio ariketa horretan, Bilbaok bere azterketa eskaintzen digu. Eta izenburuari kasu eginez, jo nahi izan du ur sakonak ere miatzera, naiz eta badirudien, gure esparru literarioan, sakontzeak beldurra ematen duen, edo esango nuke, nolabait, gutxietsi egiten den ariketa dela, baina azken boladan, hainbat idazleen ahotan, eta lanetan, presente dagoena. Egunerokotasunetik, azterketa jaso batera nolabait igaro garela, beharbada esperientzia propioak bultzatuta.

Idazleak bere lana sei ataletan banatu du, bakoitzak bere izenburuarekin, eta atal bakoitzean, poema multzo bat agertzen da izenburuari dagokion gaia edo kezkarekin. Deigarria da, eta hau azken euskal poesian ematen den joera bat da, egiten den hautua idazlearen guztiz biografikoak diren datuak azaltzearena; poesia ezberdinetan pasarteak daude, poetaren bere egunerokoan gertakari suertatzen direnak, gertakari horiek non unibertsalizatzen dira. Leire Bilbaok liburu orekatua lortu du bere ariketa honetan.