susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Sartu-irtena | Sistemaren gunea »

Mea culpa / Uxue Apaolaza / Elkar, 2011

Mea culpa I.E. / Aizu!, 2011-12

Ziur al zaude Facebooken laguntzat dituzun horiek zuk uste duzun pertsonak direla? Aztertu ondo zerrenda, Lurren adiskide ohiei gertatutakoa jazotzea nahi ez baduzu. Nor den Lur? Bada, Uxue Apaolazaren eleberriko protagonista nagusia, Madrilen bizi den neska gazte euskalduna, literatur beka bat irabazi ostean liburua idatzi behar duena. Haatik, eleberria ez da autobiografikoa, hemen amaitzen baitira nobela honen protagonistaren eta nobelaren idazlearen arteko kointzidentziak, Apaolazak ere Igartza saria irabazteari esker kaleratu baitu Mea culpa, bere lehen eleberria.

Istorioan murgilduta, Lurrek nerabezaroko Mikel lagunaren argazkia ikusiko du egunkari batean. Irudiak ondo itxi gabeko zauriak ireki eta ahaztuak nahi lituzkeen oroitzapenak ekarriko dizkio. Erruduntasun sentimenduak eragindako amorrua piztuko da beragan eta, ondorioz, institutuko lagunak Facebooken bilatu eta hiltzea erabakiko du, bere nobela idazten jarraitzen duen bitartean.

Mugak lausoak dira Mea culpa eleberriaren eta protagonista idazten ari den nobelaren artean, eta horrek zaildu egiten du irakurketa. Esaldien egitura ere nahiko katramilatsua da, baina logikoa ere bai, Lurrek buruan duen anabasa islatzeko erabiltzen duelako idazleak. Hala ere, narrazio interesgarria da Apaolazarena, berritzailea, hausnarketarako hainbat eztabaidagai eskaintzen dituena: ezker abertzalearen jarrera ETAren ekintzekiko, koadrilaren izaera itxia, lesbianismoa, familia…