susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Gizakiaren kontra | Poz hutsa »

Bizitza homeopatikoak / Xabier Mendiguren / Susa, 2008

Bizitza homeopatikoak M. Egimendi / Aizu!, 2008-11

Bizitzan zerbait ona gertatzen bazaizu, aurretik beste zer edo zer gaizki atera zaizulako izango da. Edo alderantziz. Edota zeure kontzientziaren aurkako zerbait eginez gero, onbidean jarri beharko duzu berriro zeure burua oreka berreskuratzeko. Bizitzaren sentimendu homeopatikoa. Badirudi horrelako zerbaitetan sinesten duela liburu hau osatzen duten bi narrazioetako bateko protagonistak. Eta beste narrazioko protagonistari, berriz, garai gogor bat etorriko zaio gainera… Orain arte nahi bezala bizi izan delako, akaso?

Bi narrazio labur, edo bi ipuin luze, independenteak. Bi protagonista. Bata, gizonezkoa; emakumea, bestea. Berrogei urtetik gorakoak biak ere. Eta biak arazoetan sartuak, gure herriko errealitatean hurbil eta ezagun egiten zaizkigun arazoetan.

Baina badira ezberdintasunak ere. Lehen narrazioa lehenengo pertsonan kontatua dago, eta protagonistak buruari buelta asko ematen dizkionez, horrela dabil kontakizuna ere, aurrera eta atzera denboran, baina irakurlea galtzeko arriskurik gabe.

Bigarren narrazioa, berriz, hirugarren pertsonan kontatzen da, eta irakurterrazagoa gerta liteke, narrazio linealari eusteaz gain, elkarrizketak ugariagoak direlako. Baina ez dago aparteko zailtasunik euskara ikasleentzat, bietan ere ahozko hizkeratik hurbil dagoen hizkuntza erabiltzen duelako idazleak.