susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Infernuko hesteetan | Berria zahar »

Mozorroaren xarma / Asel Luzarraga / Erein, 2008

Mozorroaren xarma M. Egimendi / Aizu!, 2008-06

Mozorrotutako pertsonaiaz betetako eleberria da Asel Luzarragaren hau, ondo ipinita du izenburua. Zigor euskalduna da protagonista nagusia, baina munduko herrialde ezberdinetako beste pertsonaia batzuen laguntzaz hariltzen da Thailandian kokatzen den narrazioa. Esan bezala, ia guztiak dira mozorrotutako pertsonaiak, arrazoi batengatik edo bestearengatik euren burua ezkutatzen dutenak edo den bezalakoa agertzen ez dutenak.

Horrela, narratzaile orojakileak baimenduta, irakurleak badaki gutxi gorabehera nolakoak diren eta zer pentsatzen duten, istorioa ulertzeko adina besterik ez bada ere, baina pertsonaiek eurek ez dute elkarren arteko berri handirik. Bada, hala ere, pertsonaia nagusi bat irakurleak ere oso gutxi ezagutzen duena: Zigor herritik Asiaraino joatera bultzatu duen Tawi ederra, hain zuzen ere.

Istorioa bera xelebre samarra da, baina baditu irakurketa oso atsegin egiten duten hiperbole, ironia eta umore puntuak. Horien artean daude narratzaile orojakile ezezagun batek, bere burua idazlearengandik bereizi nahi duenak, egiten dituen iruzkinak, irakurlearekin are harreman estuagoa lortzen laguntzen dutenak. Bestalde, istorioaren amaieran ustekaberik handiena izan beharko lukeena (narkotrafikatzailearen identitatea) oso argia da ia hasieratik, baina konpentsatzeko-edo, badira beste ustekabe txiki batzuk. Finean, irakurketa atseginean murgiltzen gaituen nobela.