« Eguneroko gauza txikiak | Amodio gutunak oinordetzan »

Zubigilea / Lutxo Egia / Susa, 2007

Zubigilea M. Egimendi / Aizu!, 2008-03

Arkitekto gazte bat da Lutxo Egiaren nobela honetako narratzailea. Bere ikuspuntutik, lehen pertsonan, kontatzen digu istorioa. Arkitektoa Bilboko Zorrotzaurre auzorako zubi baten egitasmoan dabil lanean, baina eleberrian kontatzen diren bi istorioen arteko zubietako bat ere bada. Egitasmoa osatu nahi duten arkitekto enpresa ezberdinen arteko elkarlan eta azpijokoek osatzen dute kontakizunaren ildo bat. Bestea, berriz, 60ko hamarkadan Bartzelonan Francoren aurka egin nahi izandako sabotaje batek ardazten du (Andres Peruarena protagonista da bi istorioen arteko beste zubia).

Dena da zubia Egiaren eleberri honetan. Narrazioaren zubiari eusten dioten kapitulu edo zutabeak ere modu berezian tartekatzen dira, eta egitura argia eskaintzen diote irakurleari bi ildoen artean nahas ez dadin. Arkitektura egitasmoaren gaineko kapituluek Bilboko zubi zaharren izena daramate, idazleak maite duen behialako Bilbo haren seinale diren zubiena (azken urteotan eraikitakoak aipatu egiten dira nobelan, baina ez onerako, hiriaren eredu berriaren ezaugarri diren zubi horiek ez dute-eta egilearentzat izenburutzat hartzeko funts nahikorik). Bartzelonako sabotajearen narrazioa osatzen duten kapituluek, aldiz, zenbaki soil bat daramate izenburutzat.

Bi istorio eleberri batean, Bilboren bi irudi bi izenez ezagutzen den itsasadarraren inguruan.