susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Gure baitatik ihesean | Eroak »

Kaxa huts bat / Beñat Sarasola / Susa, 2007

Poesiaren amaiera Javier Rojo / El Correo, 2007-10-10

Beñat Sarasolak “Kaxa huts bat” izeneko poema liburuarekin eman dio hasiera bere literatur ibilbideari. Nabaria da idazlea ahots propioa bilatzeko ahaleginetan dabilela, liburuak nahiko desberdinak diren lau zati baitauzka. Hala ere, liburu interesgarri baten aurrean gaude. Poema batzuek, lehenengo atalean adibidez, eguneroko hizkera arruntetik hurbil daude, poema horietan erabiltzen diren gaiekin bat datorrelarik. Izan ere, poesiaren amaieraz aritzen dira poema horiek, eta jakina, poesiaren amaierarekin batera, poesia mota berriak bilatzeko beharra ikus dezakegu bertan. Hau da, nola izan behar da XXI. mendearen hasierako poesia, utopiek huts egin dutenean? Ideia batek zeharkatzen du liburu osoa, honela laburbil daitekeena: Etorkizuna hauxe da, behinola amestutako etorkizuna, gu gaur egun bizi garen mundu kaotiko honetan gauzaturik baitago. Honelako planteamenduan, edertasuna bilatzen duen poesiak ez du leku handirik (edonola ere, zer da edertasuna honelako mundu batean?) eta idazleari aukera bakartzat planteatzen zaiona errealitatearen kronika egiten duten poemak egitea da. Hori lortzeko, hizkera zuzena eta narrazioaren mugan dauden testuak erabiltzen ditu.