susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Longa kapa beltza | Ipuin antzeko alegi mingotsak »

Itsastxorien bindikapena / Omar Nabarro / Susa, 1985

Itsastxorien bindikapena F. J. Mendiguren / Susa, 1985-07

“Itsastxorien bindikapena” deritzan liburu hau dugu Omar Nabarro poetaren lehena. Bestetan Edorta Jimenez izena daraman mundakar hau idazle oparoa agertu zaigu, prentsarako lanez gain bai baititu honez gero beste zenbait liburu argitaratzeko gertu. Hitz egin dezagun, hala ere, liburu honen gainean.

Hiru zati bide ditu: liburuari titulua ematen diona, “Tristuraren inbentarioa” deiturikoa eta “Alkodola” izena daramana. Bakoitzean besteetan ez bezalako gai eta idaztankeratan saiatua zaigu. Oro har eta inolako zehaztasunik gabe, esan liteke poema mota hauek bereiz genitzakeela mamiari dagokionez:

Inpresionistak: bertan pintzelkada sendo, lodi eta zehatzez paisaia urbano-maritimoaz dihardu, bestetan aurkitutako hiriaren zoramena, bakardadea eta lirikotasun herdoildua ditugu hemen ere.

Kontzeptualak: hitz eta esanahien jokoen bitartez lortutako efektu ziztagarri eta zirraragarriak.

Borrokalariak: gutxi batzuk dira, eta Arestiri egindako omenaldien itxura dute.

Maitasunezkoak eta existentzialak: bigarren partekoak eta hitz neurtuzkoak gehienbat. Alkoholari eskainitakoak ditugu azkenik.

Nola halako iruzkin honetan neurtitzean erakutsitako malgutasun eta maisutasuna goraipatu nahi nituzke, sarritan beroni uko egitea superazio baino, ezintasuna baita. Naturaren presentzia erabatekoak eta aliterazio, simetria joko eta bestelako teknikek poemagile honek bere berea duen unibertso poetiko batetan murgilarazten gaituzte.