« Ezkutukoak desestaliz | Azalaren oroimena »

Mohamed eta parroko gorria / Martin Ugalde / Elkarlanean, 2000

Alegoria moduko bat Javier Rojo / Ipar Atea, 2001

Martin Ugalderen azken nobelak Mohamed eta parroko gorria du izena. Argumentua gerra zibilaren garaian kokatuta dago eta dudarik gabe, bitxitasun punttu bat ere badauka. Izan ere, eleberri honetan Mohamed izeneko mutil marokoarraren istoria kontatzen da, zeina, bizitzaren gora-beherek hala bultzatuta, gerra zibilaren hasierak Euskal Herrian (Bilbo inguruan) harrapatzen baitu, koartel bateko militarrentzat zerriak zaintzeaz arduratzen delarik. Istorio honek ematen duen lehenengo inpresioa sinesgarritasun ahularena da, batez ere istorioan agertzen diren hainbat elementuk motibazio txikia dutela baitirudi. Bestaldetik, istorio zatikatu honetako elementu gehienak betetzen duten funtzioagatik baino gehiago sinbolo moduan hartzen duten balioagatik aukeratuta daude: pertsonaien lanbideak, eguraldia bera, jaten dutena… dena sinbolo sare batean bilduta dago, ia-ia alegoria moduko bat sortzeko punturaino.