« Ezkutukoak desestaliz | Azalaren oroimena »

Hitzezko zubia. Euskal poesia 1990-2000 / Askoren artean / Letras de Cal, 2000

Antologia bat Javier Rojo / Ipar Atea, 2001

Batzuek pentsatu ohi duten iruntzitara, euskal poesiaren bideak anitzak eta desberdinak dira. Euskal poesian aritzen diren idazleek kopuru txikia osatzen dute, baina inolaz ere ezin esan daiteke talde bakarra osatzen dutenik. Azken hamarkadako poesia izan daiteke honen adibide, eta, frogagarri gisa, Galizia aldetik datorkigun antologia elebidun (galiziera-euskara) hau: A ponte das palabras. Poesia vasca 1990-2000. Hitzezko zubia. Euskal poesia 1990-2000, Jon Kortazarrek koordinatu duen lana. Irizpide zehatz bat erabili da antologia hau egiteko: bertan agertzen diren idazleen lehenengo liburua, izenburuak aipatzen duen hamarkadakoa izan behar da, baina beraien artean dauden aldeak ikusita, nekez esan daiteke, asmoz eta ikuskeraz, belaunaldi batekoak direnik. Eta honelako liburuetan gertatzen denez, gusto guztietarako poemak daude. Testigantza moduan bederen (eta ez horregatik bakarrik), liburu interesgarria dugu hau.