« Erromantizismoaz | Kalamidadeen liburua »

Leiho-oihalen mugetan / Garcia Trujillo / Iturbide / Kortazar / Erein, 1997

Arkitektoaren planuak ikertzen Ritxi Lizartza / Argia, 1997-04-27

Gaia, Juan Mari Lekuona poeta, irakaslea, ahozko literaturan aditua, ikerlea… baina lehenik eta behin poeta. Ikerleak, literatura aztertzen egunetik egunera bere prestigioa erakusten digun Jon Kortazar eta, berarekin batera, Amaia Iturbide eta Sebastian Garcia Trujillo. Lau lanek osatzen dute liburua, lehen biak Sebastianenak, poeta oiartzuarraren poesiagintza aurkezteko lehenengoa eta lehen liburuak aztertzeko bigarrena. Amaia Iturbidek, berriz, Juan Mariren orain arteko libururik orekatsuena (sic) aztertuko du, “Ilargiaren Eskola”. Azkenak, Kortazarrena, “Mimodramak eta ikonoak” ikergai.

Sebastianen lehen lanak bildu egiten digu poetak bere sorkuntza-lanaz duen iritzia, jokaera, berezitasunak eta, era berean, hainbat adituk ere aitortu diotena. Beraz, pintzela modu trebean erabiltzen du ikerleak. Bigarrenean, idazleak bizitzaren aurrean duen jarrera poesiagintzan nola agertzen den erakutsiko digu. Era berean, bere idaztankera liburutik liburura nola aldatzen den.

Amaia Iturbidek azterketa hiru gunetara bideratu du: mezua, egitura eta estiloa. Emakumea, emea du gai, eta gai hori lantzeko eraikuntza arkitektoniko espiral baten antzera osatzen du liburua, jokoz beterik. Hizkera, berriz, hermetikoa, metalinguistikoa.

Jonek, azkenik agian barrokoena den liburua aztertzen du, orain arteko azkena, heldutasuneko lana, berriz ere egituraren garrantzia azpimarragarria, poetaren jakinduria eta lanaren osagarri, eta denen gainetik idazle humanista eta sentiberaren emaitza biribila.

Ondoriorik ez, bilduma lana eta azterketa, bide egokia irakurlea Juan Mari Handiaren poemak irakurtzera bultzatzeko