susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Zeruan jositako poemak | Literatura txikia »

Azaro urrunetako intifadak / Garikoitz Berazaluze / Elkar, 1996

Mundua intifada bat dea? Itxaro Borda / Argia, 1997-01-12

Garikoitz Berasaluze, zarauztar poeta gaztearen lehen lanak eskutan hartzean senditzen dugu, Mattin marrazkilariak moldatu azaletik beretik arrisku larrian gaudela: alahaina, poesia bakoitza hitz-oldar bortitza da, puntu finalera heltzean bakarrik treguaren sinatzera behartua dena. Irakurketa denbora, galerna anarkikoa da, inseguritatea, ulermenaren begietan.

Kaiero bilduma estrenatzen du Garikoitz Berasaluzek “Azaro urruneIako intifadak” deitu liburu honekin, Elkar argitaletxearen egiturak baliatuz. Halatan behielako Lubaki banda-kideek badute hor eremu ireki bat, poesiak, narrazioak, ipuinak eta beste publikatzeko. Harkaitz Kaierok “kometitu” aitzin-solasean, agertzen digu nolako segida den Lubaki eta Kaieroren artean, baten bihotz desagertuan bermatzen dela bestearen bihar edo etziko sosegua. Kaierotarren inbasioaren ondorioz hamabi liburu ukanen ditugu laster aipagai. Desafiotik desafiora!

Hostorik hosto, Garikoitz Berasaluzeren olerki obrara itzuliz, bihotz taupadatsu eta luma deslokalizatua susmatzen da, itsas bazter ezagunetarik Europako hiri minbera zein pairatuetan zehar dabilkiguna: Sarajevo, Srebrenica, Grosny, Amsterdam eta nola ez Lisboa, guztiak erreferentzi gisa erabiliak naski. Hitzak barrikadetan nola harriak, hala botatzen ditu poetak, zentsu imediatotik urrun, zenbaitetan debaldetan, erran nahi haita zentsurik batere gabe, oldar-keinuaren edertasun hutsaren truke, amodioaren eta libertatearen mailukatzeko. Ez ote du ibai basatiak hain xuxen bere zentsua itsasoaren magal sakonean kausitzen?

Badira bakea ekartzen diguten poemarioak, gozoak, neguko gau hotzak hitzez berotzen dizkigutenak; alderantziz badira zenbait duda buruan sakatzen digutenak, irakurketa guda-bide zedarritzen digutenak: halakoxea da Garikoitzena.