susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Oraiko olerki sorta-bat | Desiriko alegiak »

Guero / Axular / Euskaltzaindia, 1988

Guero Josu Landa / Argia, 1989-04-02

Euskal literaturak duen garantzi filologikorik haundieneko liburua argitalpen fakzimilez argitaratua izan da Euskaltzaindiaren eskutik. Honela aurkeztu nahi izan du Akademiak argitalpena:

“Euskaltzaindiak, euskalarien eta bereziki sortzailekide zen Julio de Urquijo jaunaren gogoa betez, Axularren Guero birrargitaratzen du. (…) Fr. Luis de Granada, Guero-ren iturrietarik bat baita, beronen laugarren mendeburuan argitarapen hau babestu nahi izan du Kultura Ministeritzako Liburu eta Biblioteken Zuzendaritza Orokorrak)”.

Esan beharra dago ere fakzimilezko ateraldi hau egiteko, Gipuzkoako Foru Diputazioko Julio Urkixo liburutegian dagoen aleaz baliatu direla Euskaltzaindiakoak, eta 1.500 ale zenbakituaz hornitu dela argitalpena.

Hau ez da “Guero”ren fakzimila argitaratzen den aurreneko aldia, 1910-1933 bitartean Urquijok zuzentzen zuen RIEV aldizkarian argitaratu bait zen lehenbizikoz. Añibarrok RIEVen bertan 1923-1933 bitartean bizkaierazko bertsioa egin zuela ere ezin dugu ahantzi. Fakzimil osoa batera argitaratzen den aurreneko aldia hauxe dugu ordea.

Bestalde, Axular-en lan honek betidanik jaso duen begirune filologikoaren frogatzat gogora dezagun hiruzpalau aldizkaritan puskak argitaratu izan direla, eta beronen inguruan 50tik gora artikulu idatzi direla. 1954 urtean Manuel Lekuonaren ardurapean Euskaltzaindiak argitara eman zuen laugarren argitaraldiak ordurarteko nahasketa asko garbitu zituen, eta gerora Villasante jaunak Sarako apaizaren liburuaz egindako ikerketen eta argitaraldien ondoren bazirudien “Guero”ren argitalpenaz ezer berri gutxi egin zitekeela. Fakzimil hau argitaratzea zegoen eginkizun, baina, eta hemendik aurrera filologiako ikasleek zein gainerako euskatzaleek ez dute zertan fotokopiaz baliatu behar izango lehenengoz 1643an argitaratutako liburu honen gozatzeko.