susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Literatur-zoperna, sorpresa jenerala | Azukrea belazeetan »

Samur eta gordin / Pio Berasategi / Elkar, 1987

Samur eta gordin Xabier Mendiguren / Argia, 1988-01-17

Pio Berasategi, Madrilen bizi den zegamar hau oroimenean erdi galdurik zeuzkan aditutako pasadizoekin ipuinak moldatzen, asmatzen hasi zitzaigun aspaldi eta hiru liburukitan eman dizkigu. Honako hau azkena.

Beste garai bateko giro eta pertsonaiak agertzen zaizkigu ipuinotan; Zegama ingurukoak asko eta askotan: San Adriango bazterrak, kontrabandista eta mikeleteak… Ahozko ondarearekin egindako saioa dugu Piorena, belarriz jasoak hizkuntza idatzi landuan birgogoratzeko saioa.

Berasategik badaki ahozkoa eta idatzia bi molde ez ezik bi unibertso direla kasik. Berak ez du hibridorik egin nahi izan, eta idazle honen ezaugarri nagusia zera litzateke: hizkuntzarekin etengabe jolasteko abilezia eta joera. Euskara erraxera zaletuei gordin gertatuko zaie, baina adierazpide berrien bila dabiltzanentzat samur ez bada ere aberasgarri izan dakieke.

Lekuz kanpo legoke kontatze teknika berrizaleak bilatzea hemen; beste erizpide batzuk erabili behar neurtzeko, bestelakoak baitira egilearen interesak: esate oatera, pertsonaia hauen bidez gure herritarren nortasunaren aztarnaren batzuei antzematea. Hortik Joxe Mari Satrustegiri egindako eskaintza aitorpena.