susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ihesi | Ahanzturaren artxipelagoa »

Uneka... gaba / Miren Agur Meabe / Labayru, 1986

Uneka… gaba Mikel Mendizabal / Argia, 1987-04-12

Miren Agur Meabe, orain artean Idatz eta Mintz aldizkarian iharduten zen lekeitiarraren lehen liburua dugu hau, 11 narrazio motzek lotua. Liburua lehen kolpetik ikusita, bi gauzez jabetzen gara. Batetik ipuin bakoitzak daraman irudi aberatsaz, eta euskalkiaz bestetik, ipuinak bizkaiera batuz idatziak bait dira. Hizkuntzarekin segiz, esan dezagun maila handiko idazkera duela lekeitiar gazteak, eta idazterakoan garbizaletasuna oinarri izan ez badu ere, hizkuntzaren egokitasunari eta berarekin lana artez egiteari arreta berezia ipini diola.

Berez ipuinak direna aurkeztuz, ia guztietan ageri diren kostanteak aitatu behar lirateke: batetik, gertaera klasikoetatik bazterrera ibilia dugula idazlea, barne bizikizun geldoak idazkera mamituan itxuratuz, maitasuna, giza harremanen hausdura mingarriak, aspaldiko oroitzapenen itsaskortasun astuna, unearen gozamena edo tristura latzaren deskribapena landuz.

Narrazio laburretan barna, bizitzaren ikuspegi etsia da nagusi, intimismoa izaki soineko bakar. Aipatzekoa da ere emakumezko pertsonaiak asko direla liburuan, garai joanen itzala denbora guztian inguruka darabiltelarik.

Jar dezagun amaitzeko liburuko ipuin zenbait lehen ere kalean dela literatur aldizkari bidez.