Ahanzturaren artxipelagoa / Juan Luis Zabala / Elkar, 1987

Ahanzturaren artxipelagoa Mikel Mendizabal / Argia, 1987-04-19

Ipuin sorta berria argitaratu du J.L. Zabalak Elkar argitaletxearen eskutik; eta ez da kaxkarra bere lana kopuruan behintzat, 65 ipuinetik gora dira eta; oso gai mota ezberdinak agertzen dira, amodioa, heriotza, oinazea, frustrazioak etabar. Denak alabaina badute antzeko oinarria: bizitzaren alderdi ezkorrak, absurdoak, zurikeriak… Ez da ordea bertan umorerik falta zatar guzti horren barruan, adibidez autoreak ondo ironizatzen du pertsonaia bat heriotza bezperan dagoena, Jainkoari bere bizitzako eginkizunen justifikazioa ematen saiatuz, zerua irabazteko noski. Ez dira falta ere amodiozko erlazio bitxiak, bukaeran autoreak betiko galdera egiteko: zer da azken finean amodioa?

Denetik eskeintzen digu Zabalak ipuin oso berezi hauetan. Denak lehenengo pertsonaian idatziarik daude eta denak motzak dira, batzuk marra batzutara bakar bakarrik iritsiz.

Autorea J.L. Zabala azpeitiarra, lan pila argitaratu ditu honez gero. 1984. urtean Tene liburu lehiaketa irabazi eta urte horretan bertan “X. Azkue” sariaren elaberri sailean geratu zen garaile “Zigarrokin zitrin baten azken keak” lanarekin. Aldizkari publikazioak ere ez zaizkio falta, Susa, Plazara, Literatur Gazeta eta beste zenbait aldizkaritan.