« Teatrora, algara eta katartsi bila | Itsasoak iraultzan »

Terrorista / Karlos Santisteban / Haranburu editorea, 1986

Terrorista Iñaki Camino / Argia, 1986-05-04

Karlos Santistebanek poema liburu bat eta beste narrazio liburua argitaratu ditu oraintsu. Duela bi bat urte ere, narrazio motzari eta poesiari ekin zion antzetsu, hizkuntza aldetik garai hartako barrokismotik apenas ezer geratzen bada ere. Hizkera aldatu da, baina ez narratzeko modua. Narrazio erraza, konplikaziorik gabea, lineala, eta eguneroko arazoez diharduen gaia. Alde honetatik, pretentsio gehiegi gabeko prosa dela esan behar dugu, gaiaren tratamendua axaleko samarra iruditu bait zaigu, narrazio baterako markoa aurkitu eta gero, lana borobildu gabe utzi bailuen edo, lanari benetan ekin beharreko momentuan liburua bukatzea alegia. Guk behintzat eskematismo itxura hartu diogu Santistebanen lan honi. Bertan, gazte batzu sexuaren nahiz abertzaletasun eta iraultzaren bidean nola barneratzen diren erakusten zaigu. Bilbo inguruan biltzetik ekintza zuzenera pasatzen diren gazte hauek ETAn bukatzen dute. Halako batean erasoa sofritzen dute eta protagonista Baiona aldera doa. Han segi behar bizitzen eta honek beste pasadizoak dakarzkio gure gizonari. “Uda batez” izeneko narrazioan erabilitako ikaratze teknikak darabiltza oraingoan Santistebanek berriz ere, egoera beltzenaren ikara eta sufrikarioaren adierazgarri gisa.