« Teatrora, algara eta katartsi bila | Itsasoak iraultzan »

Babiecaren hotzikarak / Joseba Alkalde / Susa, 1986

Babiecaren hotzikarak Iñaki Camino / Argia, 1986-05-04

Baliteke zenbaitek liburu hau eskuartean hartzerakoan, berandu gabe ostikada batez despeira ematea. Beste askok aldiz, lasaiago jokatuko dute eta poemak emaro irakurri eta dezifratzen saiatuko dira, hitz ederki korapilatutako eta poetiko hatzuk duten indarra bertan ezagutuz. Guk, liburua irakurri eta, lehen aukerari erdeinu egin diogu garbi, hasteko, liburu honetako poemak bezalakorik euskaraz egundo irakurri ez ditugulako. Zailki harrapatuko die irakurleak zentzu zuzenik poemei, hitzen lotura estetikoen mundua baita gehien bat Alkalderena, non bizia alpistezkoa den, enpaste hondakin artean biskuterrak muntatuz iluna katapultatzen baita, azukrezko txaplatak soldatzen diren eta arimak, geun metxak profeitatuz kolunpiatzen diren. Estetikaz kanpo izanen da ezer bilatu nahi izango duen irakurlerik, guk, hemendik suerte ona opa diogu. Josebak, liburuaren eskaintzan argi uzten du poema hauek ez direla inorentzat. Hori idazleak jakingo du inork haino hobeto, baina askori gusta dakizkiokeen poemak ditugu hauek, pasada bikaina ere gerta litezkeen arren.

Joseba Alkalde ezaguna egin dute Itoizen kantuek, berak eginak baitira aunitz.